АНУ-ын иргэд шинэ мэдээллийг хэвлэмэл сонин болон сэтгүүлээс бус харин интернэтийн сүлжээнээс авахыг илүүд үзэх болсон тухай Америкийн сэтгүүл зүйн «Poynter Institute» хүрээлэнгээс гаргасан илтгэлд дурджээ.Илтгэлд тэмдэглэснээр, онлайн мэдээлэл нь мэдээллийн хэрэгслүүдийн дотор анх удаагаа зурагтын дараа хоёрдугаарт орсон байна. Түүнээс гадна жилээс жилд хэрэглэгчдийнх нь тоо нь нэмэгдэж буй мэдээллийн хэрэгсэл бол интернэт сүлжээ юм. Харин радио, телевиз, хэвлэмэл сонин, сэтгүүлүүдийн хувьд тухайн үзүүлэлт нэмэгдээгүй байна. Хамгийн олон хэрэглэгчтэй хэвлэл мэдээллийн хэрэгслийн жагсаалтыгорон нутгийн телевиз урьдын адил тэргүүлсэн хэвээр байгаа ажээ.

«Poynter» компаниас явуулсан санал асуулгад оролцогсдын 34 хувь нь сүүлийн хоногуудад мэдээллийг интернэт сүлжээнээс уншсан гэж хариулсан бол 31 хувь нь хэвлэмэл сонин уншсан гэсэн байна. Түүнээс гадна санал асуулгад оролцсон 18-аас 29 нас хүртэлх настай залуучуудын 65 хувь нь интернэт нь тэдний хувьд мэдээллийн гол эх сурвалж болохыг хэлжээ. Өнгөрсөн онд онлайн мэдээллийн хэрэгслүүд нь зар сурталчилгааны орлогын хэмжээгээрээ анх удаа хэвлэмэл сониныг гүйцсэн байна. Зар сурталчилгаа өгөгсөд өнгөрсөн онд тухайн салбарт 2009 оныхоос 13,9 хувиар их буюу 25,8 тэрбум долларын орлого оруулжээ.